Friday, 16 October 2020

 ಡಾ|| ಎಸ್. ಶ್ರೀಕಂಠಶಾಸ್ತ್ರಿ

ಯವರ ಹೇಳಿಕೆಯಂತೆ ೧೯೫೩ರಲ್ಲಿ
ಸಿರಿಭೂವಲಯದ ಕಾರ್ಯವು
ಜಗತ್ತಿನಲ್ಲಿ ೭-೮ ಜನಗಳಿಗೆ
ಮಾತ್ರ ಆಸಕ್ತಿ ಇರುವುದೆನಿಸಿತ್ತು!
ಈಗ Fb ಒಂದರಲ್ಲೇ ಸುಮಾರು
೨೦ಕ್ಕೂ ಹೆಚ್ಚುಜನ ಈ ಕಾವ್ಯದಲ್ಲಿ
ಅಭಿಮಾನ ಹೊಂದಿದ್ದಾರೆ!
೩೦ ವರ್ಷದಲ್ಲಿ ಸುಧಾರ್ಥಿಯು
ಸಾಧಿಸಿದ್ದು ಇದಿಷ್ಟನ್ನೇ!!
ಇಂದಿನ ವೈಜ್ಞಾನಿಕಯುಗದಲ್ಲಿ
ಲಕಾಂತರ ಜನಗಳಿಗೆ ಒಮ್ಮೆಗೇ
ಈಕಾವ್ಯದಪರಿಚಯಒದಗಿದರೂ
ದೊರೆತಫಲವಿದು ಗುಡ್ಡವನು
ಬಗೆದು ಇಲಿಯನ್ನುಹಿಡಿದಂತೆ!!
ಕನ್ನಡದ ಕುಲದವರ
ಕಾವ್ಯದಾಸಕ್ತಿಯೂ
ಇದಕಿಂತ ಬೇರಲ್ಲ
ಭೂವಲಯದೊಳಗೆ!!
ಕುದುರೆಯನು ಕರೆದೊಯ್ದು
ಕೆರೆಯೊಳಗೆ ನಿಲಿಸಿದರು,
ನೀರಕುಡಿಯುವುದದುವೆ
ಕುದುರೆಯಾ ಮನದಿಚ್ಛೆ!!
ಕೆರೆಯ ಅಂಗಳಕಂತು
ಕರೆದೊಯ್ದುದಾಗಿಹುದು
ಕುಡಿಯದಲೆ ಬಿಡುತಿರಲು
ನನಗೇಕೆ ಚಿಂತೆ!?
ಸಿರಿಭೂವಲಯದ
ಸುಧೆಯನು ಸವಿಯುತ
ವೃದ್ಧಿಸಲಿನಿಮ್ಮಗಳ
ಸಂಸ್ಕಾರಶರಧಿಯದು
ಜಗದಪರಿಧಿಯವರೆಗೆ.
ಅಧಿಕಮಾಸವಿದು
ಅಧಿಕವಾಗುತಲಿರಲಿ
ಅಧಿಕಜನಗಳಿಗದುವೆ
ಅಧಿಕಫಲತರುತಿರಲಿ
ಹೌದು ಪೂರ್ವಸಿದ್ಧತೆಗಾಗಿ
ಈಕಾವ್ಯದ ಸರಳಪರಿಚಯದಲ್ಲಿ
ಅಲ್ಪ ವಿರಾಮವಿದ್ದದ್ದುನಿಜ.
ಈಗ ಮತ್ತೆ ಹರಿಯಲಿದೆ ಈ
ಕಾವ್ಯರಸದಾ ಪ್ರವಾಹ.
ಸಧ್ಯದಲ್ಲಿಯೇ!!!
-ಸಿರಿಭೂವಲಯದಸುಧಾರ್ಥಿ.

Sunday, 4 October 2020

ಕುಮುದೇಂದು/ಪಂಪರೊಳು ಮಿಗಿಲಾರು ಜಗದೊಳಗೆ ಈ ಈರ್ವರೊಳಗೆ?

ಕುಣಿದುಕುಪ್ಪಳಿಸುತಿವೆ ಕೂಪಮಂಡೂಕಗಳು

ಪಂಪನೆಂಬುವನವನೆ ಹಳಗನ್ನಡದ ಮೊದಲ ಕವಿಯೆಂದು! 

ತನ್ನೊಡೆಯನ ಬೆಡಗಂ ಪಿಡಿದು  ’ಪಂಪಭಾರತ’ಮೆಂಬ ’ವಿಕ್ರಮಾರ್ಜುನವಿಜಯ’

ವನು ರಚಿಸಿದೊಡೆ  ಪಂಪನೆಂದು ನೆಗಳ್ತೆವೆತ್ತವನ ಪೊಗಳ್ವುದು ಆಪದಮಲ್ತೆ!?

ಪಂಪನುಸುರಿದವಾಣಿಯ ಕಂಪಿನೊಡಗೂಡಿ ’ಅರ್ಥ’ಪಡೆದವರೆಷ್ಟು ಪೊಡವಿಯೊಳಗೆ!? ಪಂಪನಾಡಿದನುಡಿಯ ಬಿಡಿಸಿಪೇಳ್ದವನೆಂದು  ಖ್ಯಾತಿವೆತ್ತವನೋರ್ವನೇ ಧಾರಿಣಿಯೊಳುತಾ ಮುಳಿಯತಿಮ್ಮನಲಾ! ತಿಮ್ಮಪಯ್ಯನು ಬಿಡಿಸಿದ ನುಡಿಯಬಲದಲಿ ಮುಂದೆ ಮೆರೆದರು  ಅತುಲ ಭುಜಬಲ ಪರಾಕ್ರಮಿಗಳುತಾವ್ ಪೊಡವಿಯೊಳ್ ಪಂಪನ ಪೆಸರ ಮುಗಿಲಿಗೇರಿಸಿದೆವೆಂದು!!

ಈ ಮುದಲ್  ’ಅಭಿನವಪಂಪ’ನೆಂಬಗ್ಗಳಿಕೆ ಪೊಂದಿರ್ದ ಹದಿನಾಲ್ಕುಶತಕಗಳ ಹಿದಿನವ ನಾಗಚಂದ್ರನೂ ತಾನ್  ’ಪಸರಿಪ ಕನ್ನಡಕ್ಕೊಡೆಯನೋರ್ವನೇ ಸತ್ಕವಿ ಪಂಪನಾವಗಂ’  ಎಂದು ಪರಾಕುಹೇಳಿದವ! ಮುಂದಡಿಯಿಡಲ್  ’ಕುವೆಂಪು’ ಪೂರ್ವದ ಬಿ.ಎಂ.ಶ್ರೀ. ಟಿ.ಎಸ್. ವೆಂಕಣಾರ್ಯರೂಂ  ಅನಂತರದ, ತ.ಸು.ಶಾಮರಾಯ, ತುಸು ಮುಂದಿನ  ಹಂಪನಾ ಇತ್ಯಾದಿಗಳ್ ’ಪಂಪ ನಭೂತೋ ನಭವಿಷ್ಯತಿ’  ಎಂದಂದು ಪಂಪನಹೊಗಳುಭಟರೇ ಆಗಿರ್ಪರ್. 

ತನಗೆ ಅಶ್ರಯವಿತ್ತ ಅರಿಕೇಸರಿಯಂ ಪೊಗಳಿ, ಭಾರತದ ಕಥೆಯ ಹಸಗೆಡಿಸಿದ ಪಂಪನ ಗುರಿಯದುತಾನ್ ತನ್ನಯ ಧಣಿಯಕೀರ್ತಿಯು ಶಾಶ್ವತಮಾಗಿರಲೆಂಬುದೊಂದೆವಲಾ. 

 ಆದೊಡಮಿದು ಅಲ್ಪಾಕಾಂಕ್ಷೆ ನಿಚ್ಚಂಮಿದು.

ಪಂಪಪೂರ್ವದ ಶತಕದಿ ಅವತರಿಸಿರ್ದ, ಕುಮುದೇಂದುಮುನಿತಾಂ ಆವ ಅರಸನ ಊಳಿಗದ ಕೂಳಿಗೂ ಕೈಯೊಡ್ಡದವ ತಾನ್. ಸರ್ವಜ್ಞತಾನ್ ದಿಟದಿ. ಜಗದೆಲ್ಲ ಜ್ಞಾನವಂ ವೇದಮಾರ್ಗದಲರಿದವಂ, ಜಗದೊಳಿರುವೆಲ್ಲ ಭಾಷೆಗಳ ಕೃತಿಗಳಂ ಪಿಡಿದೌಂಕಿಸಿತನ್ನ ಕಾವ್ಯದಲಿ ಗಿಡಿದುತುಂಬಿದ ಜಗದೇಕೈಕ ಕವಿ ಪುಂಗವನೀತಂ ಕುಮುದೇಂದು. ಜಗದ ಜ್ಞಾನ,  ಸುಜ್ಞಾನ, ವಿಜ್ಞಾನವಾವುದೇ ಇರಲಿ, ಅವುಗಳಂ ತನ್ನ ಅಂಗುಲಿಯಮೂಲದಲಿ ಕುಣಿಸಿಬಿಸುಟವನೀತಂ   ತಾನಂದು ಹಿಂದಿಂದು, ಮುಂದಿನರೆಲ್ಲರ ಭಾಷಾಶೈಲಿಯಂ  ತಂದು ತುಂಬಿದನು ತನ್ನ ಕಾವ್ಯದುದರದಲಿ. 

ತನ್ನಕಾವ್ಯದ ಹಿರಿಮೆ ಗರಿಮೆಯಕುರಿತು ಬಾರಿಬಾರಿಗೂ ಒರೆದಿರುವನೀತಂ. ತನ್ನನುಂ ಕುರುತಿಲ್ಲಿ ಬರೆದಿರುವುದತಿಅಲ್ಪಂ! 

ಕನ್ನಡದ ಜನುಮವದು ಜಗದಾದಿಯಿಂದೆಂದು ಉಸುರಿ, ತ್ರಿಕಾಲಂಗಳಲಿ ನವರೂಪ ಧರಿಸಿರ್ಪ  ಕನ್ನಡದ ಸೊಗಡು ಸುಭಗತೆ ಸರಳತೆಯ ಶಿಖರಗಳ ನೌಕಿಸಿತನ್ನ ಕಾವ್ಯದಲಿ ಚಿರಸ್ಥಾಯಿಗೊಳಿಸಿದವಂ ಕುಮುದೇಂದು ಮುನಿತಾನ್!!   ಪಂಪರನ್ನರೇ ಇರಲಿ, ಜನ್ನಪೊನ್ನರೆ ಇರಲಿ, ಕುಮರವ್ಯಾಸನ ಕಾವ್ಯಮೆಚ್ಚಿದ ಕುವೆಂಪು  ಪೂರ್ವೋತ್ತರದ ಕನ್ನಡದ ದಿಗ್ಗಜಗಳೇ ಇರಲಿ; ಇಂತಿವರಾರ ಕಣ್ಗಳೂ ಒಮ್ಮೆಯಾದರೂ ಕಾಣದಾಗಿಹ ಕನ್ನಡದ ಆದಿಕಾವ್ಯವಿದು ಸಿರಿಭೂವಲಯ ತಾನ್ ! ಜಗದಕಾವ್ಯವಿದರ ಸನಿಹವೂಂ ಸುಳಿಯದವರೆಂತು ಇದರ ಸೊಬಗನರಿಯಲಕ್ಕುಂ. ಇಂತಿರ್ಪಕಾವ್ಯವಿದು  ಕನ್ನಡದ ಹಾದಿ ಬೀದಿಗಳ ಜನಮೆಚ್ಚುವ ಜನಪದಕಾವ್ಯಮಾಗಲೆಂಬುದೆ ಎನ್ನ ಮನದಿಂಗಿತಮಾಗಿರ್ಪುದಲಾ. 

ದಶಕಗಳ ಹಿಂದಿನಿಂ ಹೃದಯದಲಿ ಹುಗಿದಿದ್ದ ಭಾವಗಳನಿಂದು ಪರಿಯಬಿಟ್ಟಿಹೆನಿಲ್ಲಿ ಕನ್ನಡದ ಕುವರರಿಗೆ ಅರಿವಾಗುವ ಪರಿಯಲಿ ಒರೆದೊರೆ   ಸಿರಿಭೂವಲಯದ ಸುಧೆಯನರ್ಥಿಸುವನಲಾ. 

                             _()_


Sunday, 12 July 2020

ಸಿರಿಭೂವಲಯಕಾವ್ಯದ ಪ್ರಥಮಖಂಡದ ಐದನೇ ಅಧ್ಯಾಯಾಂತರ್ಗತ ಸಂಸ್ಕೃತ ಸಾಹಿತ್ಯ:


ಐದನೇ ಅಧ್ಯಾಯದ ಪ್ರರ್ಣಪದ್ಯ ಸಂಖ್ಯೆ ೯೫ ರಿಂದ ೧೪೫ರ ವರೆಗೆ ಅಂತರಶ್ರೇಣಿಯಲ್ಲಿ (ಅಶ್ವಗತಿ) ಸಾಗಿದಾಗ ದೊರೆಯುವ ಸಂಸ್ಕೃತಸಾಹಿತ್ಯವು ಪ್ರಾಚೀನವಾದ ೧೮ಭಾಷೆಗಳ ಲಿಪಿಯ ಸಿದ್ಧಮಾತೃಕಾವರ್ಣಮಾಲೆಯನ್ನು ವಿವರಿಸುವುದಾಗಿದೆ.
'ಅಥವಾ ಪ್ರಾಕೃತ ಸಂಸ್ಕೃತ ಮಾಗಧ ಪಿಶಾಚಭಾಷಾಶ್ಚ ಶೂರಸೇನೀಚ ಷಷ್ಟೋತ್ರಭೇದೋ ದೇಶ ವಿಶೇಷಾದಪಭ್ರಂಶಹ ಕರ್ನಾಟ ಮಾಗಧ ಮಾಲವ ಲಾಟ ಗೌಡ ಗುರ್ಜರ ಪ್ರತ್ಯೇಕತ್ರಯ ಮಿತ್ಯಷ್ಟಾದಶ ಮಹಾಭಾಷಾ ಸರ್ವಭಾಷಾಮಯೀಭಾಷಾ ವಿಶ್ವ ವಿದ್ಯಾವಭಾಸಿನೇ ತ್ರಿಷಷ್ಟಿಹಿ ಚತುಃಷಷ್ಟಿರ್ವಾ ವರ್ಣಾಾಹ ಶುಭಮತೇಮತಾಃ ಪ್ರಾಕೃತೇ ಸಂಸ್ಕೃತೇಚಾಪಿ ಸ್ವಯಂಪ್ರೋಕ್ತಾಹ ಸ್ವಯಂಭುವಾ ಅಕಾರಾದಿ ಹಕಾರಾಂತಂ ಶುದ್ಧಾ ಮುಕ್ತಾವಲೀಮಿವ ಸ್ವರ ವ್ಯಂಜನ ಭೇದೇನ ದ್ವಿದಾಭೇದಮುಪಯ್ಯುಷೀಂ ಅಯೋಗವಾಹಪರ್ಯುಂತಾಂ ಸರ್ವ ವಿದ್ಯಾಸುಸಂಗತಾಂ ಅಯೋಗಾಕ್ಷರಸಂಭುತಿಂ ನೈಕಬೀಜಾಕ್ಷರೈಶ್ಚಿತಾಂ ಸಮವಾದಿಃ ದಧತ್ಬ್ರಾಹ್ಮೀ ಮೇಧವಿನ್ಯತಿಸುಂದರೀ ಸುಂದರೀ ಗಣಿತಂ ಸ್ಥಾನಂ ಕ್ರಮೈಹಿ ಸಂಯುಗಧಾಸ್ಯತ್ ತತೋಭಗವತೋ ವಕ್ತ್ರಾನಿಹಿ ಸ್ರುತಾಕ್ಷರಾವಲೀಂ ನಮ ಇತಿವ್ಯಕ್ತ ಸುಮಂಗಲಾಂ ಸಿದ್ಧಮಾತೃಕಾಂ' ಎಂಬ ಸಾಹಿತ್ಯವು ದೊರೆಯುತ್ತದೆ. ಭಟ್ಟಾಕಳಂಕನ ಶಬ್ದಾನುಶಾಸನದಲ್ಲಿ ಹಾಗೂ ಪಾಣಿಯ ವ್ಯಾಕರಣದಲ್ಲಿ ಅಂದಿನ ಕನ್ನಡ ವರ್ಣಮಾಲೆಯನ್ನು ಕುರಿತು ದೊರೆಯುವ ವಿವರಣೆಯೂಕೂಡ ಕೆಲವೊಂದು ವ್ಯತ್ಯಾಸಗಳೊಂದಿಗೆ ಇದೇ ಆಗಿವೆ ಎಂಬುದನ್ನು ಕರ್ಲಮಂಗಲಂ ಶ್ರೀಕಂಠಯ್ಯನವರು ವಿವರಿಸಿದ್ದಾರೆ. ಈ ಕಾರಣದಿಂದಾಗಿ ಪಾಣಿನಿಯ ಕಾಲದಲ್ಲೇ ೬೪ ಧ್ವನಿಸಂಕೇತಗಳ ವರ್ಣಮಾಲೆಯು ಕನ್ನಡಭಾಷೆಯದೆಂಬ ವಿಚಾರ ಖಚಿತವಾಗಿದೆ! ಆದರೂ ಈ ೬೪ ಧ್ವನಿಸಂಕೇತಗಳ ವರ್ಣಮಾಲೆಯು ಸಂಸ್ಕೃತದ್ದೆಂದು ನಿರ್ಧರಿಸುವ ಆಧುನಿಕ ವಿದ್ವಾಂಸರ ವಿತಂಡವಾದದಿಂದಾಗಿ ಸಂಸ್ಕೃತಭಾಷೆಯ ಪೇಟೆಂಟ್ ಪಡೆದಿರುವ ಜರ್ಮನರು ಇದು ತಮ್ಮ್ಮ ಸ್ವಾಮ್ಯಕ್ಕೆ ಸೇರಿದ್ದೆಂದು ಸ್ವಾತಂತ್ರ್ಯವಹಿಸಲು ಹಾದಿ ಸುಗಮವಾಯಿತು!! ಇದು ಕನ್ನಡದ ಪ್ರಾಚೀನ ಆಸ್ಥಿ ಎಂಬುದನ್ನು ಕನ್ನಡ ವಿದ್ವಾಂಸರು ಆಗಲೇ ಪ್ರತಿಪಾದಿಸಿದ್ದಲ್ಲಿ ಸೂಪರ್ ಕಂಪ್ಯೂಟರಿಗೆ  ಸಾಫ್ಟ್ವೇರ್ ರೂಪಿಸುವಲ್ಲಿ ಸನ್ ಮೈಕ್ರೋಸಿಸ್ಟಮ್ ನವರು  ಕನ್ನಡಭಾಷೆಗೆ ರಾಜಧನ (ರಾಯಲ್ಟಿ) ಕೊಡಬೇಕಾದುದು ಅನಿವಾರ್ಯವಾಗುತ್ತಿತ್ತು.

Sunday, 14 June 2020

ಸಿರಿಭೂವಲಯ ಕುರಿತ ನನ್ನ ವಿಶ್ಲೇಷಣೆ ಪಕ್ಷಪಾತದಿಂದ ಕೂಡಿದ್ದಲ್ಲ.

ಸಿರಿಭೂವಲಯ ಕುರಿತ ನನ್ನ ವಿಶ್ಲೇಷಣೆ ಪಕ್ಷಪಾತದಿಂದ ಕೂಡಿದ್ದಲ್ಲ.

ಸಂದೇಶ್ ಜೈನ್ ಅವರೇ,  ಸಿರಿಭೂವಲಯ ಕುರಿತ ನನ್ನ ವಿಶ್ಲೇಷಣೆ ಪಕ್ಷಪಾತದಿಂದ ಕೂಡಿದ್ದು;  ಎಂಬುದನ್ನು ನಾನು ಪ್ರಜ್ಞಾಪೂರ್ವಕವಾಗಿ ನಿರಾಕರಿಸುತ್ತೇನೆ.  ಸಾಮಾಜಿಕವಾಗಿ ಮನೆಬಿಟ್ಟುಹೋಗುವವರು  ಪೂರ್ವಿಕರ ಆಸ್ಥಿಯಲ್ಲಿ ಪಾಲುಪಡೆಯದೇ ಹೋಗುವುದಿಲ್ಲವೆಂಬುದು ಖಚಿತ. ಇದೇ ಅನಿಸಿಕೆ ಹಿಂದೂಧರ್ಮದಿಂದ ಬೇರ್ಪಟ್ಟ ಜೈನಸಂಪ್ರದಾಯಕ್ಕೂ ಅನ್ವಯಿಸುತ್ತದೆ! 
ಇದನ್ನು  ನೀವು ಒಪ್ಪುವಿರೋ ಬಿಡುವಿರೋ ಅದು ನಿಮಗೆ ಸೇರಿದ್ದು! ನಾನು ಈ ಮಾತು ಹೇಳಿದಮಾತ್ರಕ್ಕೆ, ಈ ಆಧಾರದಲ್ಲಿ ನಾನು ಸಿರಿಭೂವಲಯದ ಪರಿಚಯ ಮಾಡಿದ್ದೇನೆಂದು ನಿರ್ಧರಿಸಬಾರದು!  ವೇದಗಳು ಅಪೌರುಷೇಯವೋ ಅಲ್ಲವೋ ಎಂಬುದು ನಂಬಿಕೆಯ ವಿಚಾರ. ನಂಬುವವರು ಇರುವಂತೆಯೇ ನಿರಾಕರಿಸಿವವರೂ ಇದ್ದಾರೆ. ಮುಂದೆಯೂ ಇರುತ್ತಾರೆ. ಇದೊಂದು ನಿರಂತರ ಪ್ರವಾಹ. 
ಷಟ್ಖಂಡಾಗಮದ ಮೂಲ ವೇದವೆಂದು ಸೂಚಿಸಿರುವುದು ನನ್ನ ಅನಿಸಿಕೆಯೆಂದು ಭಾವಿಸಿ ನಿರ್ಧರಿಸಿದ್ದರೆ, ಅದು ಸರಿಯಲ್ಲ.  ತನ್ನ ಆರಾಧ್ಯದೈವ ಅಷ್ಟಮತೀರ್ಥಂಕರ ಚಂದ್ರಪ್ರಭದೇವನ  ವಾಣಿಯಲ್ಲಿ  ಸಂಪೂರ್ಣ ಶ್ರದ್ಧೆ ಹೊಂದಿದ್ದ ಕುಮುದೇಂದುಮುನಿಯ ಸಿರಿಭೂವಲಯದ ಮಾಹಿತಿಯನ್ನು  ನಾನು ವಿವರಿಸಿದ್ದೇನಷ್ಟೇ!  ಇದು ನನ್ನ ಸ್ವಕಪೋಲಕಲ್ಪಿತಮಾಹಿತಿಯಲ್ಲ!!
೨೦೦-೩೦೦ ವರ್ಷಗಳಿಂದೀಚಿನ ಮೇಧಾವಿಗಳು ತಮ್ಮ ಬರಹದಮೂಲಕ ಜೈನಸಂಪ್ರದಾಯವು ವೇದಗಳಿಗಿಂತ ಪ್ರಾಚೀನವೆಂಬ ತಪ್ಪು ಗ್ರಹಿಕೆಯ ಭ್ರಮೆಯನ್ನು ರೂಪಿಸಿದ್ದಾರೆಂದು ನಾನು ಹಲವಾರು ಸಲ ಸೂಚಿಸಿದ್ದೇನೆ.  ಪ್ರಥಮಖಂಡ ೫೯ ಅಧ್ಯಾಯಗಳಲ್ಲೇ ’ಋಗ್’  ’ಋಗ್ವೇದ’  ’ಋಗ್ ಭೂವಲಯ’ ಎಂಬ ಪದಗಳು ಸಾವಿರಾರುಸಲ ಬರುತ್ತವೆ! ಇದು ನಾನು ಪರಿಚಯಿಸಿದ್ದಲ್ಲ!!  ಜೈನ ಸಂಪ್ರದಾಯದವರು ಸಿರಿಭೂವಲಯವನ್ನು ಕತ್ತಲಲ್ಲಿರಿಸಲು ಇದು ಮುಖ್ಯಕಾರಣ! ಆದರೆ ಅವರ ದುರಾದೃಷ್ಟ! ಈ ಮಾಹಿತಿಯು  ಪ್ರಥಮಖಂಡದಲ್ಲೇ  ಪ್ರತ್ಯಕ್ಷವಾಗಿದೆ. ಅಲ್ಲಿಗೆ ಯೋಜನೆ ವಿಫಲವಾಯಿತೆಂದು ನಾನು ವಿಶ್ಲೇಷಿಸಿರುವುದು ನಿಜ.
 ಮುಂದಿನ  ೮ ಖಂಡಗಳಲ್ಲಿ ಪ್ರಾಚೀನ ಶಾಸ್ತ್ರಗ್ರಂಥಗಳಿಗೆ ಸಂಬಂಧಿದ ಮಾಹಿತಿಗಳೇ ಹೆಚ್ಚಿರುತ್ತವೆಂದು ನನ್ನ ಅನಿಸಿಕೆ.  ಅವುಗಳ ಸರಳಪರಿಚದಿಂದ  ದೊರೆಯುವ ಮಾಹಿತಿಗಳನ್ನು”ನಮ್ಮ ಖಾತೆಗೆ ಸೇರಿಸಿವ ಪ್ರಯತ್ನ’  ಎಂದು ನಿರ್ಧರಿಸಬೇಡಿ!!  ಈಗ ಕಾಲ ಬದಲಾಗಿದೆ. ಯಾರೂ ಯಾರನ್ನೂ ಸುಲಭವಾಗಿ ವಂಚಿಸಲಾಗದು.
ನೇಮಿ ತೀರ್ಥಂಕರರಿಂದ ದ್ವಾರಕೆಯ ಶ್ರೀಕೃಷನಿಗೆ ಉಪದೇಶವಾದ ನೇಮಿ ಗೀತೆಯು ಜೈನಸಂಪ್ರದಾಯದ ಕೊಡುಗೆ ಎಂದು ನಾನು ಪರಿಚಯಿಸಿರುವುದು ನಿಮ್ಮಲ್ಲಿ ಯಾರಿಗೂ ತಿಳಿಯದು! ಕೃಷನು ಯುದ್ಧಕ್ಕೆ ಪ್ರೇರಣೆ ಮಾಡಿರುವುದರಿಂದ ಅದು ’ಅಹಿಂಸಾಧರ್ಮಕ್ಕೆ’ ವಿರೋಧವೆಂದು ಲೆಕ್ಕಾಚಾರ ಮಾಡಿ ಅದನ್ನು ಜೈನರ ಕೊಡುಗೆ ಎಂಬುದನ್ನು  ನಿರಾಕರಿಸಿದ್ದವರು, ಇನ್ನೂ ನಿರಾಕರಿಸುವವರು ಜೈನಸಂಪ್ರದಾಯದವರೇ. 
ಈ ಮಾಹಿತಿಯನ್ನು ನಾನು ವಿಸ್ತಾರವಾಗಿ ಚರ್ಚಿಸಿದ್ದೇನೆ.  ಇಲ್ಲಿ ಅದು  ಸೇರಲಾಗದು. ಷಟ್ಖಂಡಾಗಮಗಳ ವಿಚಾರವೂ ಅಷ್ಟೇ! ಸಿರಿಭೂವಲಯದಲ್ಲಿರುವ ಮಾಹಿತಿಯನ್ನು ಪರಿಚಯಿಸಿದ್ದೇನೆ.   ಇದು ಪರಿಚಯಕಾರನ ’ತಿರುಚುವ’ ಪ್ರಯತ್ನವೆಂದು ಯಾರಾದರೂ ಭಾವಿಸಿದರೆ ಅದಕ್ಕೆ ನನ್ನ ಆಕ್ಷೇಪವಿಲ್ಲ. ಅವರಿಗೆ ಆ ಸ್ವಾತಂತ್ರವಿವೆ.  ಆದರೆ, ಇದು ಪಾರಿಚಯಕಾರನ ತಪ್ಪು ಎಂಬುದನ್ನು ಮಾತ್ರ ನಾನು ಜೀವಿಸಿರುವ ವರೆವಿಗೂ ನಿರಾಕರಿಸುತ್ತೇನೆ.  ಇಂದಿನ ಪರಿಸರದಲ್ಲಿ  ಸಂಸ್ಕೃತಭಾಷೆಯ ’ವೇದ’ ಸಾಹಿತ್ಯವು ಹೆಚ್ಚು ಜನಗಳಿಗೆ ಹತ್ತಿರವಾಗಲಾರದೆಂಬುದು ಸರ್ವವಿದಿತ.  ಆದರೆ ಸರ್ವಜ್ಞ ಸ್ವರೂಪಿಯಾದ ಕುಮುದೇಂದು ಮುನಿಯು  ವೇದೋಪನಿಷತ್ತುಗಳ ಸಮಗ್ರ ಮಾಹಿತಿಯನ್ನೂ ಆದಿನಾಥನ ಕೇವಜ್ಞಾನದ ಮಾಹಿತಿಗಳನ್ನೂ ಅಲ್ಲಿಂದ ತನ್ನವರೆಗೆ ಹರಿದುಬಂದಿರುವ ಜ್ಞಾನಗಂಗೆಯನ್ನು ಸಮಾವೇಶಗೊಳಿಸಿ, ಅತ್ಯಂತ ಪುರಾತನವಾದ ಕನ್ನಡಭಾಷೆಯಲ್ಲಿ ಸಿರಿಭೂವಲಯದ ನಿರೂಪಣೆಮಾಡಿರುವುದರಿಂದ ಇದನ್ನು ’ಕನ್ನಡದವೇದ’ ಎಂಬು ನಾನು ನಿರ್ಧರಿಸಿದ್ದೇನೆ. ಅಂದಮಾತ್ರಕ್ಕೇ ಇದನ್ನೂ ’ನಮ್ಮ ಖಾತೆಗೆ ಸೇರಿಸಿಕೊಂಡುಬಿಟ್ಟ’ ಎಂದು ಗಾಭರಿಯಾಗಬೇಡಿ!
 ಇದು ವೇದ ಹಾಗೂ ಜೈನ ಸಂಪ್ರದಾಯದ  ಜಂಟಿಖಾತೆ! ಇದನ್ನು ಯಾರೂ ಅಪಹರಿಸಲಾಗದು!!  ಕನ್ನಡದ ಇಂದಿನ ಶ್ರೇಷ್ಠತೆಗೆ, ಜಗದ್ವಿಖ್ಯಾತಿಗೆ  ಸಿರಿಭೂವಲಕಾರಣ. ಸಿರಿಭೂವಲಯದ ಕರ್ತೃ ಜೈನಸಂಪ್ರದಾಯದವನು.  ಈ ಶ್ರೇಯಸ್ಸಿನಲ್ಲಿ ಹೆಚ್ಚಿನಪಾಲು ಉಳಿದೆಲ್ಲ ಸಂಪ್ರದಾಯದವರಿಗಿಂತಲೂ ಜೈನಸಂಪ್ರದಾಯದವರಿಗೆ  ಸೇರುತ್ತದೆ ಎಂಬ ನನ್ನ ವಿಶ್ಲೇಷಣೆಯು ಬೆಳಗಾವಿಯ ಜೈನ ಸಮುದಾಯಕ್ಕೆ ಮನವರಿಕೆಯಾಗಿದೆ. ಸುಮಾರು ಒಂದು ಗಂಟೆಯ  ’ಪವರ್ ಪಾಯಿಂಟ್ ಪ್ರೆಸೆಂಟೇಷನ್’ ನಲ್ಲಿ  ಇದನ್ನು ಸೂಚಿಸಿದ್ದೇನೆ.  ಇಷ್ಟಾದರೂ ನಾನು ವೇದ ಸಮೂಹದ ಪಕ್ಷಪಾತಿ ಎಂದು ದೋಷಿಸುವುದಾದಲ್ಲಿ ನನಗೆ ತೊಂದರೆ ಏನಿಲ್ಲ!!
 ಸಿರಿಭೂವಲಯದ ಪರಿಚಯಕ್ಕಾಗಿ ಬ್ರಾಹ್ಮಣಸಮುದಾಯದ ಕೆಲವರು ಸುಧಾರ್ಥಿಯನ್ನು ದೂರವಿರಿಸಿರುವುದಿದೆ! ’ಸತ್ಯವನ್ನು ತಿರುಚಿ ತನ್ನ ಖಾತೆಗೆ ಸೇರಿಸಿಕೊಳ್ಳುತ್ತಾನೆ’  ಎಂಬುದು ಜೈನಸಂಪ್ರದಾಯದಲ್ಲಿ ಹಲವರ ಆಪಾದನೆ!!  (ಅಲ್ಲಿಯೂ ಸಲ್ಲದವ; ಇಲ್ಲಿಯೂ ಸೇರದವ; ಎಲ್ಲೂಸಲ್ಲದವನೇನೋ!?) ಇದಾವುದರಿಂದಲೂ ನನಗೆ ಆಗಬೇಕಾದ್ದೇನಿಲ್ಲ!! ಯಾರಹಂಗಿನಲ್ಲೂ ನಾನು ನನ್ನ ಜೀವನವನ್ನು ಸಾಗಿಸಬೇಕಿಲ್ಲ.  ಕನ್ನಡದ ಮಹಾನ್ ಅಭಿಮಾನಿ ಕೆ. ಅನಂತಸುಬ್ಬರಾಯರ ಕಾರಣದಿಂದ (ಅವರೂ ಹಲವಾರು ವೈದಿಕರಿಂದ, ಸ್ವಜಾತಿಯ ಬಂಧುಗಳಿಂದ ದೂರಸರಿಸಲ್ಪಟ್ಟವರು!) ನನಗೆ ಗಂಟುಬಿದ್ದ  ಅಮೂಲ್ಯಕೃತಿಯ ಸರಳಪರಿಚಯ ಮಾಡಿಕೊಡುವುದು ನನ್ನ ಪಾಲಿನ ಕರ್ತವ್ಯವಾಗಿತ್ತು  ಸಾಧ್ಯವಿರುವಷ್ಟನ್ನು ಸಮರ್ಪಕವಾಗಿ ಮಾಡಿ ಮುಗಿಸಿದೆ. ಇದನ್ನು ಯರು ಹೇಗೆಬೇಕಾದರೂ ಸ್ವೀಕರಿಸಬಹುದು/ ನಿರಾಕರಿಸಬಹುದು!  ಜೈನಧರ್ಮಕ್ಕೆ  ಇವನೊಬ್ಬ  ಉಗ್ರವಾದಿಯೆಂದುಬೇಕಾದರೂ ನಿರ್ಧರಿಸಬಹುದು. ಅದಕ್ಕೆ ನನ್ನ ವಿರೋಧವೇನಿಲ್ಲ. ಅದು ಅವರ ನಿಲುವಿನ ’ಸತ್ಯಾನ್ವೇಷಣೆ’ !! ಅಷ್ಟೇ!!
                        -ಸಿರಿಭೂವಲಯದಸುಧಾರ್ಥಿ. ೭೬೭೬೪೭೪೮೭೨.

ಸಿರಿಭೂವಲಯದ ಸರಳ ಪರಿಚಯಗಳನ್ನು ಕುರಿತು ಕನ್ನಡಿಗರ ಆಸಕ್ತಿ ಎಂಥದು!!!

ಸಿರಿಭೂವಲಯದ ಸರಳ ಪರಿಚಯಗಳನ್ನು ಕುರಿತು ಕನ್ನಡಿಗರ ಆಸಕ್ತಿ ಎಂಥದು!!!

ಸಿರಿಭೂವಲಯದ ಒಳಹೊಕ್ಕು, ಅಲ್ಲಿನ ಮಾಹಿತಿಗಳನ್ನು ಸರಳವಾಗಿ ಪರಿಚಿಯಿಸುವಕಾರ್ಯದಲ್ಲಿ ಶ್ರಮವಹಿಸಿ ಯಶಸ್ವಿಯದ ಹಾಸನದ ಸುಧಾರ್ಥಿಯು ,  ಕಳೆದ  ಒಂದು ದಶಕದ ಅವಧಿಯಲ್ಲಿ ಸುಮಾರು ೩೦೦೦ ಪುಟಗಳ ವ್ಯಾಪ್ತಿಯಲ್ಲಿ ೧೧ ಕೃತಿಗಳನ್ನು ಪ್ರಕಟಿಸಿದ್ದಾಯಿತು. ಅವುಗಳನ್ನು ಕೆಲವರು ಮಾತ್ರ ಗಮನಿಸಿ,  ಒಂದು ರೀತಿಯಲ್ಲಿ ಈ ಕೃತಿಗಳನ್ನು ಮೂಲೆಗುಂಪುಮಾಡಿದ್ದಾಯಿತು.  ಕಳೆದೊಂದು ವರ್ಷದಿಂದ ನಾನು fbನಲ್ಲಿ ಬರೆಯತೊಡಗಿದಮೇಲೂ ಕೇವಲ ಕೆಲವರಿಂದಮಾತ್ರ ಅದಕ್ಕೆ ಪ್ರತಿಕ್ರಿಯೆ ದೊರೆಯುತ್ತಿತ್ತು.  ಪ್ರಾಸಂಗಿಕವಾಗಿ ನಾನು ಸಿರಿಭೂವಲಯದಲ್ಲಿ ಅಂತರ್ಗತವಾಗಿರುವ ’ಋಗ್ವೇದವೇ ಜಗತ್ತಿನ ಎಲ್ಲ ಜ್ಞಾನಕ್ಕೂ ಮೂಲ’ ಎಂಬ ಮಾಹಿತಿಯನ್ನು ಸೂಚಿಸುವಲ್ಲಿ ಪ್ರಕಟಿಸಿದ ಕೆಲವು ಸಾಲಿನ ಲೇಖನಕ್ಕೆ ಜೈನಸಮುದಾಯದ ಕೆಲವು ಮಿತ್ರರು ಅದನ್ನು ಪ್ರಶ್ನಿಸಿ ತಮ್ಮ ಅನಿಸಿಕೆಗಳನ್ನು ಸೂಚಿಸಿದರು. ಅವುಗಳಿಗೆ ಸೂಕ್ತ ಉತ್ತರ ನೀಡಿದರೂ ಅವರಿಗೆ ಅದು ಸಮಂಜಸವೆನಿಸಲಿಲ್ಲ.  ಉತ್ತರ; ಪ್ರತ್ಯುತ್ತರಗಳಸರಣಿಯು ಬೆಳೆದು ಅನಪೇಕ್ಷಿತವಾದ ಚರ್ಚೆಯಾಯುತು ಈ ಕಾರಣದಿಂದಾಗಿ ನಾನು ಆ ಚರ್ಚೆಯಿಂದ ಹೊರಬಂದು ಈ ಸಂಬಂಧದ ಚರ್ಚೆಯನ್ನು ಮುಕ್ತಾಯಗೊಳಿಸುವ ನಿರ್ಧಾರಮಾಡುವುದು ಅನಿವಾರ್ಯವಾಯಿತು.  ನನ್ನಲ್ಲಿ ಉಳಿದಿರುವ ಸಿರಿಭೂವಲಯದ ಸರಳ ಪರಿಚಯಕೃತಿಗಳ ದೊಡ್ಡ ರಾಶಿಯನ್ನು  ಮುಂದೆ ಹಣಕ್ಕೆ ಮಾರಾಟಮಾಡದೇ, ’ದಾನ’ವಾಗಿ ನೀಡುವ ನಿರ್ಧಾರಮಾಡಿದೆ.  ಆಸಕ್ತಿ ಇರುವವರು ಖುದ್ಧಾಗಿ ಬಂದು ಅದನ್ನು ಪಡೆಯಬಹುದು.  ಯಾಪನೀಯ ಜೈನಸಂಪ್ರದಾಯದ ಮುನಿ ಕುಮುದೇಂದುವಿನ ಮೂಲಕ ಬೆಳಕುಕಂಡಿರುವ ಜಗತ್ತಿನ ಈ ಅತ್ಯಂತ ಅಚ್ಚರಿಯ ಕಾವ್ಯದಲ್ಲಿ ನಿರೂಪಿತವಾಗಿರುವ ಕನ್ನಡದ  ಪ್ರಾಚೀನತೆ ಹಾಗೂ ಪ್ರಾಧಾನ್ಯತೆಯನ್ನು ಪರಿಚಯಿಸುವ ಏಕೈಕ ಉದ್ದೇಶದಿಂದ ಈ ಸರಳಪರಿಚಯಕಾರ್ಯಕ್ಕೆ ನಾನು ಕೈಹಾಕಿದ್ದೇ ವಿನಃ, ವೇದಸಂಪ್ರದಾಯ ಹಾಗೂ ಶ್ರವಣ ಸಂಪ್ರದಾಯದ ತಿಕ್ಕಾಟವನ್ನು ನೋಡುವುದು ಇದರ ಉದ್ದೇಶವಲ್ಲ,  ಎಂಬುದನ್ನು ಈ ಮೂಲಕ ನನ್ನ ಅಭಿಮಾನಗಳ ಗಮನಕ್ಕೆ ತರಲು ಇಚ್ಛಿಸಿದ್ದೇನೆ. ವಂದನೆಗಳು.
                 - ಸಿರಿಭೂವಲಯದ ಸುಧಾರ್ಥಿ

Friday, 29 May 2020

ಸರಳಪರಿಚಯಕೃತಿಗಳ ಒಂದು ಸಂಕ್ಷಿಪ್ತ ಸಮೀಕ್ಷೆಭಾಗ: ೧.


ಸಿರಿಭೂವಲಯ ಕುರಿತು ಸುಧಾರ್ಥಿಯು ರೂಪಿಸಿರುವ
     ಸರಳಪರಿಚಯಕೃತಿಗಳ ಒಂದು ಸಂಕ್ಷಿಪ್ತ ಸಮೀಕ್ಷೆಭಾಗ: ೧.

೧)** ಕೃತಿಕರ್ತೃವನ್ನು ಕುರಿತು**

ಕ್ರಿ. ಶ. ೮೦೦ ರ ಸುಮಾರಿನಲ್ಲಿ ಕುಮುದೇಂದುಮುನಿಯು ರಚಿಸಿರುವ ಕನ್ನಡ ಅಂಕಕಾವ್ಯ ಸಿರಿಭೂವಲಯದ ಅಕ್ಷರ ಅವತರಣಿಕೆಯನ್ನು  ಬೆಂಗಳೂರಿನ ಸರ್ವಾರ್ಥಸಿದ್ಧಿ ಸಂಘದವರು ೧೯೫೩ ಹಾಗೂ ೧೯೫೫ ರಲ್ಲಿ ಪ್ರಕಟಿಸಿದ್ದರೂ ಈ ಕಾವ್ಯದ ರಚನೆಯು ಸಾಮಾನ್ಯ ಓದುಗರಿರಲೀ, ವಿದ್ವಾಂಸರಿಗೂ ಓದಲು ಸಾಧ್ಯವಾಗದ ಜಟಿಲವಾದ ರಚಾನಾಕ್ರಮವನ್ನು ಹೊಂದಿದ್ದ ಕಾರಣದಿಂದಾಗಿ ಅದೊಂದು ’ಕಬ್ಬಿಣದ ಕಡಲೆ’ ಎಂಬ ಅಪಖ್ಯಾತಿಗೆ ತುತ್ತಾಗಿ, ಕತ್ತಲಕೋಣೆಯನ್ನು ಸೇರಿತ್ತು. 
ಈ ಸಿರಿಭೂವಲಯಕಾವ್ಯವನ್ನು ಸಾಮಾನ್ಯ ಓದುಗರ ಆಲೋಚನೆಗೆ ನಿಲುಕುವಂತೆ  ಸರಳವಾಗಿ ಪರಿಚಯಿಸುವ ದಿಸೆಯಲ್ಲಿ ಹಾಸನದ ಸುಧಾರ್ಥಿಯು ಬೇರೆ ಬೇರೆ ಸ್ತರದಲ್ಲಿ ೧೧ ಪರಿಚಯ ಕೃತಿಗಳನ್ನು ರೂಪಿಸಿದ್ದಾಗಿದೆ.  ಸುಮಾರು ೩೦೦೦ ಪುಟಗಳಿಗೂ ಹೆಚ್ಚಿನ ವ್ಯಾಪ್ತಿಹೊಂದಿರುವ ಅವುಗಳನ್ನು ಓದುವುದೂ ಇಂದಿನ ಸಾಹಿತ್ಯಾಭ್ಯಾಸಿಗಳಿಗೆ  ಶ್ರಮದ ಕಾರ್ಯ. ಈ ಕಾರಣದಿಂದಾಗಿ ಅವುಗಳ ಸಂಕ್ಷಿಪ್ತ ಪರಿಚಯವನ್ನು ಈ ಲೇಖನಮಾಲೆಯ ರೂಪದಲ್ಲಿ ಇಲ್ಲಿನ ಓದುಗರಿಗೆ ಒದಗಿಸುವ ಕಾರ್ಯಕ್ಕೆ ಕೈಹಾಕಿದ್ದೇನೆ. ಆಸಕ್ತಿ ಇರುವ ಕೆಲವರಿಗಾದರೂ ಈ ಪ್ರಯತ್ನವು ಉಪಯುಕ್ತವಾದೀತೆಂಬ ನಂಬಿಕೆ ನನಗಿದೆ.
ಸುಧಾರ್ಥಿಯು ಪ್ರಾರಂಭಿಸಿದ ಸಿರಿಭೂವಲಯದ ಸರಳ ಪರಿಚಯಕೃತಿಗಳಪೈಕಿ ಮೊದಲನೆಯದಾದ  ’ಸರ್ವಭಾಷಾಮಯೀಭಾಷಾ ಸಿರಿಭೂವಲಯಸಾರ’  ಎಂಬ ಕೃತಿಯು ೨೦೧೦ರಲ್ಲಿ ಹುಬ್ಬಳ್ಳಿಯಲ್ಲಿ ಪ್ರಕಟವಾಯಿತು.
ಈ ಸರಳಪರಿಚಯಕೃತಿಯ ಲೇಖಕ ಸುಧಾರ್ಥಿಯವರು ’ಅನಂತ ಕೀಬೋರ್ಡಿನ ’  ನಿರೂಪಕ ಸ್ವರ್ಗೀಯ ಕೆ. ಅನಂತಸುಬ್ಬರಾಯರ ಅಭಿಮಾನಿ. ಸಿರಿಭೂವಲಯಕಾವ್ಯದ ಆಳವಾದ ಪರಿಚಯ ಹೊಂದಿದ್ದ ಕೆ. ಅನಂತಸುಬ್ಬರಾಯರು  ಅದರ ರಚನೆಯ ಸ್ವರೂಪವನ್ನು ಕುರಿತು ಸುಧಾರ್ಥಿಗೆ ಸಾಕಷ್ಟು ಮಾಹಿತಿಗಳನ್ನು ವಿವರಿಸಿ, ಈ ಕಾವ್ಯವನ್ನು ಸರಳವಾಗಿ ಪರಿಚಯಿಸುವ ಕಾರ್ಯಕ್ಕೆ ಪ್ರೇರೇಪಿಸಿದವರು.
ಈ ಮಹನೀಯರು ನೀಡಿದ ಸಮರ್ಥ ಮಾರ್ಗದರ್ಶನವನ್ನು  ಮನನ ಮಾಡಿಕೊಂಡು ಸುಮಾರು ೨೭ ವರ್ಷಗಳಕಾಲ ಏಕಾಂಗಿಯಾಗಿ ಈ ವಿಸ್ಮಯಕಾರಿ ಕಾವ್ಯದ ಅಧ್ಯಯನನಡೆಸಿ,  ಸಿರಿಭೂವಲಯಕಾವ್ಯಕ್ಕೆ ಸಂಬಂಧಿಸಿದಂತೆ  ಕಳೆದ ೬೫ ವರ್ಷಗಳಿಂದ ನಡೆದಿರುವ, ನಡೆಯಿತೆಂದು ದಾಖಲಾಗಿರುವ, ನಡೆಯಬೇಕಾಗಿದ್ದ ಹಾಗೂ ಮುಂದೆ ನಡೆಯಬೇಕಿರುವ ಚಟುವಟಿಕೆಗಳನ್ನು ಕುರಿತು ಡೆಮಿ ೧/೪ ಅಳತೆಯ ಸುಮಾರು ೪೫೦ ಪುಟಗಳ ವ್ಯಾಪ್ತಿಯಲ್ಲಿ ಬಹಳ ವಿಸ್ತಾರವಾದ  ಸರಳ ಪರಿಚಯವನ್ನು ರೂಪಿಸಲಾಗಿದೆ.   ಈ ಬರಹಗಳಲ್ಲಿ ತುಂಬಾ ಕಠಿಣವಾದ ಪದಗಳನ್ನು ಬಳಸಿ ಈ ಪರಿಚಯಕಾರನು  ವಿವರಣೆಗಳನ್ನು ನೀಡಿರುವುದಿದೆ.  ಅವುಗಳ ಪೈಕಿ ಕೆಲವೊಂದು ಪ್ರಮುಖ ಮಾಹಿತಿಗಳನ್ನು ಕುರಿತು ನೀವು ಇಲ್ಲಿ ಸಂಕ್ಷಿಪ್ತವಾದ ಮಾಹಿತಿಯನ್ನು ನೋಡಲಿರುವಿರಿ.
 ಮೂಲತಃ ತುಮಕೂರುಜಿಲ್ಲೆಯ ಹೊನ್ನವಳ್ಳಿ ಎಂಬ ಗ್ರಾಮದವರು ಕಂದಚಾರ್   ರಾಮಸ್ವಾಮಯ್ಯನವರು.   ಅರಸೀಕೆರೆಯ ’ದಾಸಪ್ಪಾ ದಿ ಗ್ರೇಟ್’ ಅವರ ಮಗಳು ವೆಂಕಟಲಕ್ಷಮ್ಮ ಹಾಗೂ  ಶ್ರೀಕಂಠಯ್ಯ ದಂಪತಿಗಳ  ಮಗಳು ಶ್ರೀಮತಿ ನರಸಮ್ಮನವರು ಈ ರಾಮಸ್ವಾಮಯ್ಯನವರ ಧರ್ಮಪತ್ನಿ.  ಈ ದಂಪತಿಗಳ ಮಗನಾಗಿ ಹಾಸನ ನಗರದಲ್ಲಿ ಜನಿಸಿದ ಕೆ.ಆರ್. ಶಂಕರನಾರಾಯಣನಿಗೆ ಚಿಕ್ಕಂದಿನಿಂದಲೂ ಕನ್ನಡಸಾಹಿತ್ಯದಲ್ಲಿ ಆಸಕ್ತಿ.  ಹಾಸನದಲ್ಲಿ ಪುರಪ್ರೌಢಶಾಲೆಯ ವಿದ್ಯಾರ್ಥಿಯಾಗಿದ್ದ ಸಮಯದಲ್ಲೇ ಕನ್ನಡ ಬೆರಳಚ್ಚುಯಂತ್ರ ಶಿಲ್ಪಿ ಕೆ. ಅನಂತಸುಬ್ಬರಾಯರ ಪರಿಚಯ. 
ಶಾಲಾಶಿಕ್ಷಣ ಪೂರೈಸಿದನಂತರ, ಹಾಸನದಲ್ಲೇ ನೂತನವಾಗಿ ಪ್ರಾರಂಭವಾದ ’ಕೈಗಾರಿಕಾ ತರಬೇತಿ ಕೇಂದ್ರ’ದಲ್ಲಿ (ಐ. ಟಿ.ಸಿ) ತರಬೇತಿ.  ೧೯೬೫ರಲ್ಲಿ ಬೆಂಗಳೂರಿಗೆ ವಲಸೆ. ಬೆಂಗಳೂರಿನ ಭಾರತೀಯ ದೂರವಾಣಿ ಕಾರ್ಖಾನೆಯಲ್ಲಿ (ಐ.ಟಿ.ಐ)  ಉದ್ಯೋಗ.  ಬೆಂಗಳೂರು ಸೇರಿದಮೇಲೆ ಸಾಹಿತ್ಯ ಕ್ಷೇತ್ರದ ಹಿರಿಯ ಚೇತನಗಳಾದ ತಿ. ತಾ ಶರ್ಮರು, ಡಾ|| ಅ.ನ. ಕೃ, ಎಸ್. ಕೆ. ಕರೀಖಾನ್, ಟಿ. ಕೇಶವಭಟ್ಟ, ಡಾ|| ಎಸ್. ಎಲ್. ಭೈರಪ್ಪ,  ನಾಡಿಗೇರ್ ಕೃಷ್ಣರಾಯರು,  ಎಂ.ಕೆ. ಇಂದಿರಾ, ಚಿ.ನ, ಮಂಗಳ ಮುಂತಾದವರೊಂದಿಗೆ  ಹೆಚ್ಚಿನ ಪರಿಚಯ. ಇದರಿಂದಾಗಿ ವ್ಯಕ್ತಿಜೀವನದಲ್ಲಿ ಸಾಕಷ್ಟು ಪರಿಷ್ಕಾರ.  ಈ ದಿಸೆಯಲ್ಲಿ ಶ್ರೀ. ಪರಮಾನಂದಭಾರತೀ ಸ್ವಾಮಿಗಳ ಯುಕ್ತ ಮಾರ್ಗದರ್ಶನ.
ಈ ಹಿಂದೆಯೇ ಕೆಲವಾರು  ನಿಯತಕಾಲಿಕಗಳಿಗೆ ಲೇಖನಗಳ ರಚನೆಗಾಗಿ ’ಸುಧಾರ್ಥಿ’ ಎಂಬ ಕಾವ್ಯನಾಮದ  ಆಯ್ಕೆಯಾಗಿತ್ತು.  ಕವನ, ನಾಟಕ, ವಿಮರ್ಶೆ, ಕಾದಂಬರಿ, ಜೀವನಚರಿತ್ರೆ, ಸಂದರ್ಶನಗಳು, ಧಾರ್ಮಿಕ ವಿಚಾರಗಳು, ಗಾದೆಗಳು  ಇತ್ಯಾದಿ ವಿವಿಧ ಪ್ರಾಕಾರಗಳಿಗೆ ಸೇರಿದ ೧೧ ಕೃತಿಗಳ ರಚನೆ, ಹಾಗೂ ಪ್ರಕಟಣೆ.
 ಅನಂತಸುಬ್ಬರಾಯರ ಪರಿಚಯದಿಂದ  ಸಿರಿಭೂವಲಯ ಕಾವ್ಯದ ಸಂಪರ್ಕ.  ಸಿರಿಭೂವಲಯಕುರಿತು ಅಧ್ಯಯನ ಹಾಗೂ ಅರಳಪರಿಚಯಕ್ಕಾಗಿ ಅವರಿಂದ ಒತ್ತಾಯ.  ಆ ವೇಳೆಗಾಗಲೇ ಕಾಲವಶರಾಗಿದ್ದ  ಕರ್ಲಮಂಗಲಂ ಶ್ರೀಕಂಠಯ್ಯನವರ ಪರೋಕ್ಷ ಪರಿಚಯ.  ಅನಂತಸುಬ್ಬರಾಯರ ಕಾಲಾನಂತರ ಅವರ ಸ್ಮಾರಕಸಂಸ್ಥೆಯಾಗಿ  ಬೆಂಗಳೂರಿನಲ್ಲಿ ’ಅನಂತಪ್ರಕಾಶನ’  ಸ್ಥಾಪಿಸಿ, ಒಂದು ದಶಕದಕಾಲ ಅದರ ಯಶಸ್ವೀ ನಿರ್ವಹಣೆ. ಈತ ರೂಪಿಸಿದ ’ಸಂಜೆಗತ್ತಲು’ ಎಂಬ ಐತಿಹಾಸಿಕ  ನಾಟಕವು ಬೆಂಗಳೂರಿನ ಆಕಾಶವಾಣಿ ನಿಲಯದಿಂದ ಪ್ರಸಾರವಾಗಿದೆ.
ಕೆ. ಅನತಸುಬ್ಬರಾಯರು, ಕೋಟವಾಸುದೇವಕಾರಂತರು, ಸುಪ್ರಸಿದ್ಧ ಆಯುರ್ವೇದ ವೈದ್ಯ ಡಾ|| ಮಳಿಯೆ ಗೋಪಾಲಕೃಷ್ಣರಾಯರು ಇವರುಗಳ ಜೀವನ ಸಾಧನೆ ಕುರಿತು ಮುಂದಿನ ತಲೆಮಾರಿಗೆ ಅಧಿಕೃತ ಆಧಾರಗ್ರಂಥಗಳ ರೂಪದಲ್ಲಿ  ’ಅನಂತ’  ’ವಾಸುದೇವ’  ’ ಧನ್ವಂತರಿ’ ಎಂಬ  ಪ್ರಮುಖ ಜೀವನಚರಿತ್ರೆಗಳ  ರಚನೆ ಹಾಗೂ ಪ್ರಕಟಣೆ. ಇವುಗಳ ಸಂಕ್ಷಿಪ್ತ ಮಾಹಿತಿಯು ಬೆಂಗಳೂರಿನ ಆಕಾಶವಾಣಿಯಿಂದ  ’ಬಾಳಬೆಳಕು’ ಕಾರ್ಯಕ್ರಮದಲ್ಲಿ ಪ್ರಸಾರವಾಗಿವೆ.
ಅಂತಸುಬ್ಬರಾಯರ ಒತ್ತಾಯದಿಂದಾಗಿ ಸಿರಿಭೂವಲಯ ಕಾವ್ಯದ ಅಭ್ಯಾಸಕ್ಕೆ ಪ್ರಯತ್ನ.  ೨೭ ವರ್ಷಗಳ ಅಧ್ಯಯನದ ಫಲವಾಗಿ ’ಸಿರಿಭೂವಲಸಾರ’ ಎಂಬ ಸರಳ ಪರಿಚಯ ಕೃತಿಯ ರಚನೆಮಾಡುವಷ್ಟರ ಮಟ್ಟಿಗೆ ಅದರಲ್ಲಿ ತಲ್ಲೀನತೆ.  ೧೯೯೮ರಲ್ಲಿ  ಐ.ಟಿ.ಐ. ನಿಂದ ಸ್ವಯಂ ನಿವೃತ್ತಿ ಪಡೆದು, ೨೦೦೦ ದಲ್ಲಿ ಹಾಸನದ ಸಮೀಪ ಹಾಲುವಾಗಿಲು ಎಂಬ  ಗ್ರಾಮಕ್ಕೆ ವಲಸೆ.
 ಫಲಭರಿತವಾದ  ಗಿಡಮರಗಳಿಂದ ಕೂಡಿದ, ಮನಸಿಗೆ ಮುದನೀಡುವ  ಚಿಕ್ಕದಾದ ಚೊಕ್ಕ ತೋಟವೊಂದರ ಅಭಿವೃದ್ಧಿಕಾರ್ಯದ ಪ್ರಾರಂಭ. ,  ೨೦೧೦ರಲ್ಲಿ  ಜೀವನದ ಮಹತ್ಸಾಧನೆಯಾಗಿ  ಸಿರಿಭೂವಲಯವನ್ನು ಸರಳವಾಗಿ, ಸಮರ್ಪಕವಾಗಿ ಪರಿಚಯಿಸುವ  ’ಕುಮುದೇಂದುಮುನಿಯ ಸರ್ವಭಾಷಾಮಯೀಭಾಷಾ ಸಿರಿಭೂವಲಸಾರ’  ಎಂಬ ಕೃತಿಯ ಪ್ರಕಟಣೆ.
ಮುಂದೆ ಸಿರಿಭೂವಲಯಕ್ಕೆ ಸಂಬಂಧಿಸಿದಂತೆ ೮ ಪರಿಚಯಕೃತಿಗಳ ರಚನೆ ಹಾಗೂ ಪ್ರಕಟಣೆ. ಇವುಗಳ ಸಂಕ್ಷಿಪ್ತ ಭಾವಾನುವಾದವು ಹಿಂದಿ ಹಾಗೂ ಇಂಗ್ಲಿಷ್  ಭಾಷೆಯಲ್ಲೂ ಪ್ರಕಟವಾಗಿವೆ. ತನ್ನ ಜೀವನದ ಸಂಗಾತಿ ಶ್ರೀಮತಿ ಗಿರಿಜೆಯು  ತನ್ನ ಕೈಹಿಡಿದಂದಿನಿಂದ  ಇಂದಿನವರೆವಿಗೂ ನೀಡಿರುವ ಸಹಕಾರವನ್ನು ಪ್ರಾಮಾಣಿಕವಾಗಿ ಸ್ಮರಿಸುವುದನ್ನೂ ಈ ವ್ಯಕ್ತಿ ಮರೆಯುವುದಿಲ್ಲ. ಸಿರಿಭೂವಲಯಕಾವ್ಯದಲ್ಲಿ ಕನ್ನಡ ಭಾಷಾ ಸ್ತಂಬಕಾವ್ಯವನ್ನು ಪ್ರತ್ಯೇಕಿಸುವಲ್ಲಿ ಶ್ರೀಮತಿ ಗಿರಿಜಾ ಅವರೂ ನೆರವುನೀಡಿ ಈ ಕಾರ್ಯದ ವೇಗವು ವೃದ್ಧಿಯಾಗುವಲ್ಲಿ ಸಹಕರಿಸಿರುವುದು ಗಮನಾರ್ಹ ಸಗತಿ.
ನಾಡಿನ ಹಿರಿಯ ವಿದ್ವಾಂಸರಾದ ಪ್ರೊ. ಜಿ. ವೆಂಕಟಸುಬ್ಬಯ್ಯನವರು ’ಸಿರಿಭೂವಲಯ ಸಾಗರ ರತ್ನ ಮಂಜೂಷ’ ಎಂಬ ಸರಳಪರಿಚಯಕೃತಿಗೆ ಮುನ್ನುಡಿ ಬರೆಯುವಲ್ಲಿ ಹಾಸನದ ಸುಧಾರ್ಥಿಯನ್ನು ’ಸಿರಿಭೂವಲಯದ ಸುಧಾರ್ಥಿ’  ಎಂದು ಸೂಚಿಸಿರುವುದು;  ಪ್ರೊ. ಜಿ. ಬ್ರಹ್ಮಪ್ಪನವರು  ’ಗೌತಮಗಣಧರರ ಸಂತತಿಗೆ ಸೇರಿದ ಸುಧಾರ್ಥಿ’ ಎಂದು  ಸೂಚಿಸಿರುವುದು ಇವರು ಜೀವನದಲ್ಲಿ ಸಾಧಿಸಿರುವ ಅಮೂಲ್ಯವಾದ ಗೌರವ ಹಾಗೂ ಪಾರಮಾರ್ಥಿಕವಾದ ಸಂಪತ್ತಾಗಿದೆ. ಸಾಹಿತ್ಯಕ್ಷೇತ್ರದಲ್ಲಿ ಅಪರಿಚಿತನಾಗಿಯೇ ಇರುವ ತನಗೆ ಇದನ್ನೂ ಮೀರಿದ ರಾಷ್ಟ್ರೀಯ/ ಅಂತರ್ ರಾಷ್ಟ್ರೀಯ ಪ್ರಶಸ್ತಿಯಗಲೀ ಪುರಸ್ಕಾರವಾಗಲೀ ಯಾವುದೂ ಇಲ್ಲವೆಂಬುದು ಈ ಪರಿಚಯಕಾರನ ನಿಲುವು.
ಕನ್ನಡದಲ್ಲಿ ಸಿರಿಭೂವಲದಂಥ ಮಹತ್ತರವಾದ ಕಾವ್ಯವಿದೆ ಎಂಬ ಮಾಹಿತಿಯು ಮುಂದಿನ ತಲೆಮಾರಿಗೆ  ಸಮರ್ಪಕವಾಗಿ ದೊರೆತರೆ,  ಮುಂದೆ ಇನ್ನೊಬ್ಬ ಸಿರಿಭೂವಲಯದ ಶ್ರೀಕಂಠಯ್ಯನವರ  ಅವತಾರವಾಗಿ, ಮುಂದಿನ ಕನ್ನಡಿಗರಿಗೆ ಸಿರಿಭೂವಲಯದ ಸಮಗ್ರ  ವಿಶ್ವರೂಪದರ್ಶನವಾಗಲು  ಅವಕಾಶವಾದೀತೆಂಬುದು  ಸುಧಾರ್ಥಿಯ  ಹಂಬಲ.   ಸಿರಿಭೂವಲಯಕಾವ್ಯದಲ್ಲಿ ಅಡಗಿರುವ ಹಲವಾರು ಅಚ್ಚರಿಯ ಮಾಹಿತಿಗಳ ಕಾರಣದಿಂದಾಗಿ,  ಸುಧಾರ್ಥಿಯನ್ನೂ, ಆತ ರೂಪಿಸಿರುವ ಸರಳಪರಿಚಯಕೃತಿಗಳನ್ನು ಬಹಳ ಜಾಣ್ಮೆಯಿಂದ ಉಪೇಕ್ಷಿಸುತ್ತ, ಪ್ರಬಲವಾಗಿ ವಿರೋಧಿಸುವವರೂ ಸಾಕಷ್ಟುಜನಗಳಿರುವುದುಂಟು.
ಇದಾವುದನ್ನೂ ಲೆಕ್ಕಿಸದೇ  ಈ ವ್ಯಕ್ತಿಯು ತನ್ನ ಹಾದಿಯಲ್ಲಿ ತಾನು,  ಶ್ರಮಿಸುವುದಾಗಿದೆ.   ಸಾಮಾಜಿಕವಾಗಿ ಯಾವುದೇ ಉನ್ನತಶಿಕ್ಷಣ ಹಾಗೂ ಸ್ಥಾನಮಾನಗಳನ್ನೂ ಹೊಂದಂದೇ  ಎಲೆಮರೆಯ ಕಾಯಿಯಂತೆ ಈ ಕ್ಷೇತ್ರದಲ್ಲಿ  ಇನ್ನೂ ಉಸಿರಾಡುತ್ತಿರುವ ಈ ಸಾಹಿತ್ಯ ಕೃಷಿಕನು ಪ್ರಕೃತ ತನ್ನ ಅಧ್ಯಯನದ ಫಲದ ಸಾರಾಂಶವನ್ನು    ಇಲ್ಲಿನ ಓದುಗರಿಗೆ ಈ ಲೇಖನಮಾಲೆಯ ಮೂಲಕ ಪರಿಚಯಿಸುವುದು ನನ್ನ ಉದ್ದೇಶವಾಗಿದೆ. ಇಲ್ಲಿನ ಓದುಗರ ಪೈಕಿ ಕೆಲವರಿಗಾದರೂ  ಇದರಲ್ಲಿ ಆಸಕ್ತಿ ಇರಬಹುದೆಂದು ಭಾವಿಸಿದ್ದೇನೆ. (ಇನ್ನೂಇದೆ)
                                               -ಜಮದಗ್ನಿಸುತ.

ಸರ್ವಭಾಷಾಮಯೀಭಾಷಾಸಿರಿಭೂವಲಯಸಾರ

ಸಿರಿಭೂವಲಯ ಕುರಿತು ಸುಧಾರ್ಥಿಯು ರೂಪಿಸಿರುವ
     ಸರಳಪರಿಚಯಕೃತಿಗಳ ಒಂದು ಸಂಕ್ಷಿಪ್ತ ಸಮೀಕ್ಷೆ
ಭಾಗ: ೨.

೧)** ಸರ್ವಭಾಷಾಮಯೀಭಾಷಾಸಿರಿಭೂವಲಯಸಾರ**

೨೦೧೦ರಲ್ಲಿ ಪ್ರಕಟವಾಗಿರುವ ಈ ವಿನೂತನವಾದ ಪರಿಚಯಕೃತಿಯು ಡೆಮಿ೧/೪ ಆಕೃತಿಯ ೪೪೪ ಪುಟಗಳ ವ್ಯಾಪ್ತಿಯಲ್ಲಿ ಬೆಳೆದಿದೆ.  ಕುಮುದೇಂದುಮುನಿಯು  ಯಾಪನೀಯ ಸಂಪ್ರದಾಯದ ದಿಗಂಬರಮುನಿ. ಯಾಪನೀಯರು ಧರ್ಮದ ವಿಚಾರದಲ್ಲಿ ತುಂಬಾ ಉದಾರಿಗಳಾಗಿದ್ದವರು.  ಕುಮುದೇಂದು ಮುನಿಯಂತೂ ಮಹಾನ್ ಮಾನವತಾವಾದಿ. ಜಗತ್ತಿನಲ್ಲಿ ಪ್ರಚಲಿತವಿರುವ ಮತ ಸಂಪ್ರದಯಗಳೆವೂ ಒಂದೇ ಮೂಲದಿಂದ ಬಂದವು ಎಂಬ ವಿಚಾರದಲ್ಲಿ ನಂಬಿಕೆ ಇದ್ದವನು. ಇದೊಂದು ಪ್ರಧಾನವಾದ ನಿಲುವು. ಇದನ್ನು ಸಮರ್ಪಕವಾಗಿ ಪ್ರತಿಫಲಿಸುವ ಉದ್ದೇಶದಿಂದ ಈ ಪರಿಚಯಕೃತಿಗೆ ಒಂದು ವಿನೂತನವಾದ ಮುಖಚಿತ್ರವನ್ನು ಅಳವಡಿಸಲಾಗಿದೆ.
ಸನತನವಾದ  ’ऒं ’ ಕಾರದಿಂದಲೇ ಜಗತ್ತಿನ ಸಕಲ ಮತಧರ್ಮಗಳೂ ಉಗಮವಾಗಿರುವ ವಿಚಾರವನ್ನು ಸೂಚಿಸುವ ಇಲ್ಲಿನ ಚಿತ್ರದಲ್ಲಿ   ’ऒं ’  ಕಾರವನ್ನು ಸನಾತನಧರ್ಮದ ಪ್ರತಿನಿಧಿಯನ್ನಾಗಿಸಿ, ಅದರಸುತ್ತಲೂ ಕಾಲಾನುಕ್ರಮದಲ್ಲಿ ಮಹಾನ್ ಧರ್ಮೋಪದೇಶಕರಾದರ ಜೈನ, ಕೃಷ್ಣ, ಬುದ್ಧ, ಏಸು, ಪೈಗಂಬರ್  ಶಂಕರ, ರಾಮಾನುಜ, ಬಸವೇಶ್ವರ, ಮಧ್ವಾಚಾರ್ಯರ ಚಿತ್ರಗಳನ್ನು ಅಳವಡಿಸಿ, ಸರ್ವಧರ್ಮ ಸಮನ್ವಯದ  ಸುಂದರವಾದ ಕಲ್ಪನೆಯನ್ನು ಸಾಕಾರಗೊಳಿಸಲಾಗಿದೆ.  ’ಸರ್ವಭಾಷಾಮಯೀಭಾಷಾ ಸಿರಿಭೂವಲಯಸಾರ’ ಎಂಬ ಅನ್ವರ್ಥಕವಾದ ಹೆಸರಿನೊಂದಿಗೆ  ’೧ ರಿಂದ ೬೪ ಅಂಕಿಗಳನ್ನೊಳಗೊಂಡ ೧೬೦೦೦ ಅಂಕಚಕ್ರಗಳು, ೭೧೮ ಭಾಷೆಗಳ ಸಾಹಿತ್ಯ, ೩೬೩ ಮತಧರ್ಮಗಳ ವಿವೇಚನೆ ಮತ್ತಿತರ ವಿಸ್ಮಯಕಾರಿ ಸಂಗತಿಗಳು’ ಎಂಬ  ಮಹತ್ವದ ಮಾಹಿತಿಯನ್ನು ನಮೂದಿಸಲಾಗಿದೆ. ಕವಿ: ಕುಮುದೇಂದುಮುನಿ.  ಸಂಶೋಧಕ: ಕರ್ಲಮಂಗಲಂ ಶ್ರೀಕಂಠಯ್ಯ.  ಸಾರಗ್ರಾಹಿ:  ಸುಧಾರ್ಥಿ ಹಾಸನ ಎಂಬ ಮಾಹಿತಿಯೂ ಅಲ್ಲಿ ನಮೂದಾಗಿದೆ.
ಸಿರಿಭೂವಲಯವನ್ನು ಕುರಿತಂತೆ ಸುಧಾರ್ಥಿಯು ರೂಪಿಸಿರುವ ’ಸಿರಿಭೂವಲಸಾರ’ ಕ್ಕೆ   ಪ್ರಸಿದ್ಧ ಶಿಕ್ಷಣತಜ್ಞ ಹಾಗೂ ಪುತ್ತೂರಿನ ವಿವೇಕಾನಂದ  ಮಹಾವಿದ್ಯಾಲಯದ ಪ್ರಾಂಶುಪಾಲರಾಗಿದ್ದ  ಪ್ರೊ. ಎಂ ಎಸ್. ಅಪ್ಪ  ಅವರು ಮುನ್ನುಡಿ ಬರೆದಿದ್ದಾರೆ.  ಮುಚ್ಚುಮರೆ ಇಲ್ಲದ ಈ ಮುನ್ನುಡಿಯು ಪ್ರಕೃತ ಪರಿಚಯಕೃತಿಯನ್ನು ಯಾರೂ ನಿರ್ಲಕ್ಷಿಸದಂತೆ  ತಡೆಯೊಡ್ಡಿದೆ! ಕಾವ್ಯದ ಸಂಶೋಧನೆ ಹಾಗೂ ಸಮಕಾಲೀನ ವಿದ್ವಾಂಸರ ಮನೋಧರ್ಮವನ್ನು ಕುರಿತಂತೆ, ಸುಧಾರ್ಥಿಯ ಬರಹವು ಬಹಳ ತೀಕ್ಷ್ಣವಾಗಿದೆ.
೨೦೦೦ ದಿಂದ ಈಚೆಗೆ ಪುಸ್ತಕಶಕ್ತಿ ಪ್ರಕಾಶನವು  ಸಿರಿಭೂವಲಯಕ್ಕೆ ಸಂಬಂಧಿಸಿದಂತೆ  ಪ್ರಕಟಿಸಿರುವ ಎಲ್ಲ ಕೃತಿಗಳ ವಿವರಗಳನ್ನೂ ಕುರಿತಂತೆ ವಸ್ತುನಿಷ್ಟವಾಗಿ  ವಿಶ್ಲೇಷಿಸಿರುವ  ಇವರ ಕೃತಿಯಲ್ಲಿ  ಬಹಳ ನಿಷ್ಠೂರವಾದ  ಶೈಲಿಯು  ಅಡಕವಾಗಿದೆ. ಕೆಲವರು ಇದನ್ನು ಒಂದು ದೋಷವೆಂದು ಪರಿಗಣಿಸಬಹುದು.  ವಾಸ್ತವತೆಗೆ ಬೆಳಕುಬೀರಬೇಕಾದಲ್ಲಿ ಪರಿಚಯಕಾರನಿಗೆ ಈ  ನಿಷ್ಠುರಶೈಲಿ ಅನಿವಾರ್ಯವಾಗಿತ್ತು.  ಮೇಲು ನೋಟಕ್ಕೆ ಈ ದೋಷವು  ಪ್ರಮುಖವೆನಿಸುವಂತೆ ಕಾಣಿಸಿದರೂ ಈ ಪರಿಚಯಕೃತಿಗಳಲ್ಲಿ  ಅಳವಡಿಸಿರುವ  ’ಅಂತರ್ಸಾಹಿತ್ಯ’ ದ ಅತಿ ಪ್ರಮುಖ ಮಾಹಿತಿಗಳಿಂದಾಗಿ  ಈ ದೋಷವು  ಗೌಣವಾಗಿಬಿಡುವುದು ಸಹಜ ಸಂಗತಿಯಾಗಿದೆ.
ಈ ವಿಶಿಷ್ಟ  ಪರಿಚಯಕೃತಿಯ  ಮುನ್ನುಡಿಕಾರರಾದ ಪ್ರೊ. ಎಂ ಎಸ್. ಅಪ್ಪ  ಅವರು  ’ಖಂಡಿತವಾದಿ ಲೋಕವಿರೋಧಿ ಎಂಬ  ನಾಣ್ನುಡಿಯೊಂದಿದೆ. ಸತ್ಯಸಂಗತಿಗಳ ಅರಿವಿರುವವರು ಖಂಡಿತವಾದಿಗಳಾಗುವುದು ಸಹಜಸಂಗತಿ.  ಈ ಹಾದಿಯಲ್ಲೇ ತಮ್ಮ ಬರವಣಿಗೆಯನ್ನು ಮುಂದುವರೆಸಿರುವ ಸುಧಾರ್ಥಿಯವರ ನಿರೂಪಣೆಯು ಕೆಲವೊಮ್ಮೆ ಕಠಿಣವೆನಿಸಬಹುದು. ಆದರೂ ಅದರ ಅನಿವಾರ್ಯತೆಯನ್ನು  ಇವರು ಸೂಚಿಸಿ, ತಮ್ಮ ಕಾಠಿಣ್ಯಕ್ಕೆ  ಕ್ಷಮೆಕೇಳುವ  ಸೌಜನ್ಯ ಹೊಂದಿರುವುದು ಗಮನಾರ್ಹ ಸಂಗತಿ.  ತಾವು ತಿಳಿದ ವಿಚಾರಗಳನ್ನು ದಿಟ್ಟತನದಿಂದ ಓದುಗರಮುಂದಿರಿಸಿ, ತಮ್ಮ ಅನಿಸಿಕೆಗಳನ್ನು ಸ್ಪಷ್ಟವಾಗಿ ಸೂಚಿಸಿ, ಅದರ ನಿರ್ಣಯವನ್ನು ಓದುಗರ  ವಿವೇಚನೆಗೇ ಬಿಡುವುದು ಇವರ ಬರಹದ  ವಿಶೇಷತೆ’  ಎಂದು ಸೂಚಿಸಿರುವುದು ಪರಿಚಯಕಾರನ ಮುಕ್ತ ಮನಸ್ಸಿನ  ಅನಿಸಿಕೆಗಳು ಬಹುಪಾಲು ಮಾನ್ಯವೆಂಬುದನ್ನು ಸಾರಿಹೇಳುವಂತಿದೆ.
ಸರ್ವಭಾಷಾಮಯೀಭಾಷಾ ಸಿರಿಭೂವಲಯದ ಒಂದು ಪಕ್ಷಿನೋಟ; ಸಿರಿಭೂವಲಯ ಕುರಿತು ಸ್ವಲ್ಪ ವಿವರ; ಸಿರಿಭೂವಲಯ ಕಾವ್ಯದ ಸ್ಥೂಲಪರಿಚಯ; ಸಿರಿಭೂವಲಯಕ್ಕೆ ಸಂಬಂಧಿಸಿದಂತೆ ಪುಸ್ತಕಶಕ್ತಿಯ ಪ್ರಕಟಣೆಗಳ ಸಾರಾಂಶ;  ಸಿಭೂವಲಯ ಒಂದು ಪರಿಚಯ; ಸಿರಿಭೂವಲಯ ಭಾಗ ೧ ರಿಂದ ೮;  ಸಾಹಸ ದೊಡ್ಡದು;  ವಿಸ್ಮಯಗಳ ಅಗರ ಸಿರಿಭೂವಲಯ;  ಗ್ರಂಥಸಂರಕ್ಷರ ಮಾತು;  ನೂತನ ಪರಿಷ್ಕರಣ ಮುನ್ನುಡಿ; ನೂತನ ಪರಿಷ್ಕರಣದ ಪ್ರಸ್ಥಾವನೆ;  ವಿದ್ವಾಂಸರ ಅಭಿಪ್ರಾಯಗಳು;  ಸಿರಿಭೂವಲಯ ಸ್ತಂಭಕಾವ್ಯಗಳು; ಸಿರಿಭೂವಲಯ ಅನಂತಸುಬ್ಬರಾಯರು ಕಂಡಂತೆ; ಸಿರಿಭೂವಲಯ ಭಾಗ ೨; ಪ್ರೊ. ಜಿ. ವೆಂಕಟಸುಬ್ಬಯ್ಯನವರ ಮುನ್ನುಡಿ; ಪ್ರೊ. ಎಸ್. ಕೆ. ರಾಮಚಂದ್ರರಾಯರ ಅಧ್ಯಕ್ಷಭಾಷಣ;  ಪ್ರೊ. ಎಲ್. ಎಸ್. ಶೇಷಗಿರಿರಾಯರ  ಅಧ್ಯಕ್ಷಭಾಷಣ;  ಡಾ||  ಟಿ.ವಿ. ವೆಂಕಟಾಚಲಶಾಸ್ತ್ರಿಗಳಭಾಷಣ; ಸಿರಿಭೂವಲಯದಲ್ಲಿ ದೊರೆಯುವ ಅಂತರ್ಸಾಹಿತ್ಯದರ್ಶನ;  ಸಿರಿಭೂವಲಯದಲ್ಲಿರುವ ಜಯಾಖ್ಯಾನಾಂತರ್ಗತ ಭಗವದ್ಗೀತಾ;  ಭಗವದ್ಗೀತೆಯ ಶ್ಲೋಕರೂಪ;  ಸಿರಿಭೂವಲಯದ ಕೆಲವು ಸಾಂಗತ್ಯಪದ್ಯಗಳು;  ಅನುಬಂಧಗಳು; ಸಿರಿಭೂವಲಯಕ್ಕೆ ಸಂಬಂಧಿಸಿದ ಮೂವರು ಮಹನೀಯರ ಸಂಕ್ಷಿಪ್ತ ಜೀವನಪರಿಚಯ; (ಯಲ್ಲಪ್ಪಶಾಸ್ತ್ರಿಗಳ ಜೀವನಪರಿಚಯ; ಕರ್ಲಮಂಗಲಂ ಶ್ರೀಕಂಠಯ್ಯನವರ ಜೀವನಪರಿಚಯ;  ಕೆ. ಅನಂತಸುಬ್ಬರಾಯರ ಜೀವನ ಪರಿಚಯ;  ಶ್ರೀಕಂಠಯ್ಯನವರ ಸಾಹಿತ್ಯದ ಸಂಕ್ಷಿಪ್ತಪರಿಚಯ; -ವಿಶ್ವಭಾಷೆಗಳಮೇಲೆಕನ್ನಡದ ಪ್ರಭಾವ;  ಯಮ-ಯಮಿ, ವೈದಿಕ ದೇವತೆಗಳು-ಈರಾನಿದೇವತೆಗಳು; ಶ್ರೀಸರಸ್ವತಿ; ಸಂಸ್ಕೃತಭಾಷೆಯಲ್ಲಿ ಹಾಡುಗಬ್ಬಗಳು;  ವೇದೋಪನಿಷತ್ತುಗಳಲ್ಲಿ  ದೇವರ ಕಲ್ಪನೆ; ಸಂಕ್ಷೇಪವಾಗಿ ಶಿವ ವಿಷ್ಣು ಬ್ರಹ್ಮರ ಕಲ್ಪನೆಗಳು; ಜಯ, ಭಾರತ, ಮಹಾಭಾರತ;  ಮಹಾಭಾರತದ ಮಹಾಸ್ವರೂಪ;  ವ್ಯಾಸನಾಮಕ ವ್ಯಕ್ತಿಗಳು; ಮಹಾಭಾರತದ ಯುದ್ಧಕಾಲ; ರಾಮಾನುಜರಕಾಲದ ಧಾರ್ಮಿಕ ಪರಿಸ್ಥಿತಿ;  ಯಜ್ಞೋಪವೀತಧಾರಣೆಗೆ  ವೇದಶಾಸ್ತ್ರಗಳ ಆಧಾರಗಳು; ಮಧ್ವಾಚಾರ್ಯರಕಾಲದ ಧಾರ್ಮಿಕಪರಿಸ್ಥಿತಿ;  ಬಡಗನಾಡುಬ್ರಾಹ್ಮಣರ ಇತಿಹಾಸ;  ಸಿರಿಭೂವಲಯ ಕುರಿತ ಪರಿಚಯಭಾಷಣಗಳು;  ಗ್ರಂಥದಹೆಸರನ್ನು ಕುರಿತು ಸ್ವಲ್ಪ ವಿವರ;  ಕಾಲಗಣನೆ; ಶಂಕರವಿಜಯಕ್ಕೆ ಸಂಬಂಧಿಸಿದ ಒಂದು ವಿಚಾರ; ಪಾಶ್ಚಾತ್ಯರ ಪುರಾಣಶೈಲಿ;  ಸಂಸ್ಕೃತಭಾಷೆಯ ಸಂಕ್ಷಿಪ್ತ ಇತಿಹಾಸ;  ಧರ್ಮ ರಾಜಕಾರಣ ಹಾಗೂ ಸಾಹಿತ್ಯ ಪರಂಪರೆಯ ಸಂಕ್ಷಿಪ್ತ ಪರಿಚಯ; ಹೆಸರಿನ ಮಹತ್ವ;  ಕನ್ನಡದ ಮಹತ್ವ; ಸಿರಿಭೂವಲಯದ ಸಂಶೋಧನೆಯಿಂದ ಬೆಳಕಿಗೆಬಂದ ಕೆಲವಾರು ತಪ್ಪುಗ್ರಹಿಕೆಗಳು,  ಸಿರಿಭೂವಲಯವು ಉಳಿದುಬಂದಿರುವ ದಿಸೆಯಲ್ಲಿ ಮಹಿಳೆಯರಪಾತ್ರ;  ಶಾಶ್ವತವಾದ ನವಸಮಾಜರಚನೆ ಒಂದು ಭ್ರಮೆ;  ಹಿನ್ನುಡಿ; -ಸಿರಿಭೂವಲಯಕುರಿತು ಒಂದುಮಾತು; ಸಿರಿಭೂವಲಯದಲ್ಲಿ ಸೂಚಿಸಿರುವ ವರ್ಣಲಿಪಿಯಭಾಷೆಗಳಲ್ಲಿ ಕೆಲವು ಹೆಸರುಗಳು; ಮುಖ್ಯಮಂತ್ರಿಗಳಿಗೆಪತ್ರ; ಕನ್ನಡಭಾಷೆಯ ಪ್ರಾಚೀನತೆಗೆ ಶಾಸನಗಳ ಆಧಾರ;  ಮಾಯಾ ಚಕ್ರಗಳು ಹಾಗೂ ಸಿರಿಭೂವಲಯದ ಅಂಕಚಕ್ರಗಳ ಸಂಬಂಧಕುರಿತು ಒಂದುಮಾತು; ಕನ್ನಡ ಅಂಕಿಗಳ ಉಗಮ ಮತ್ತು ವಿಕಾಸ;  ಸರ್ವಭಾಷಾಮಯೀಭಾಷಾ ವರ್ಣಮಾಲೆಯ ೬೪ ಧ್ವನಿ ಸಂಕೇತಗಳು;  ಮಲ್ಲಿಕಬ್ಬೆಯ ಮೂಲಪ್ರತಿಯ ನಕಲು;  ಪ್ರಥಮಚಕ್ರದ ನಕಲುಪ್ರತಿ; ಅಕ್ಷರ ಚಕ್ರ; ಗ್ರಂಥಋಣ ಎಂಬುದಾಗಿ ಸುಮಾರು ೬೬ ಶಿರೋನಾಮೆಗಳಲ್ಲಿ ಸಂಬಂಧಿಸಿದ ವಿಚಾರಗಳ ವಿವರಗಳನ್ನು ಚರ್ಚಿಸಲಾಗಿದೆ.
 ಪ್ರಿಯ ಓದುಗರೇ, ಇಲ್ಲಿಸೂಚಿಸಿರುವ ಪರಿವಿಡಿಯನ್ನು ಗಮನಿಸಿದರೇ ನಿಮಗೆ ಈ ಸರಳಪರಿಚಯಕೃತಿಯ ವ್ಯಾಪ್ತಿ ಹಾಗೂ ವಿಸ್ತಾರದ ಪರಿಧಿ ಎಷ್ಟೆಂಬುದು ವೇದ್ಯವಾಗಿರಬಹುದೆಂದು ಭಾವಿಸಿದ್ದೇನೆ. ಇಲ್ಲಿಸೂಚಿಸಿರುವ ಶಿರೋನಾಮೆಗಳನ್ನು ಕುರಿತು ಒಂದೊಂದು ವಾಕ್ಯದಷ್ಟು  ವಿವರವನ್ನು ಸೂಚಿಸಿದರೂ ಅದೇ ಒಂದು ಕಿರುಹೊತ್ತಿಯ ವ್ಯಾಪ್ತಿಗೆ ಬೆಳೆಯುವುದು ನಿಸ್ಸಂಶಯ.  ಈಕಾರಣದಿಂದಾಗಿ ನಾನು ಆ ಕಾರ್ಯಕ್ಕೆ ಕೈಹಾಕಿಲ್ಲ.
 ಆದರೂ  ಸಿರಿಭೂವಲಯದ ಖಚಿತವಾದ ಪರಿಚಯವಿಲ್ಲದೇ ಅದನ್ನು ಪುನರುಜ್ಜೀವನಮಾಡುವ ಸಾಹಸಕ್ಕೆ ಕೈಹಾಕಿ,  ಕೇವಲ ೧೯೫೩ ರ ಅಕ್ಷರ ಅವತರಣಿಕೆಯನ್ನು ಅಪೂರ್ಣವಾಗಿ ಮರುಮುದ್ರಣಮಾಡುವ ಪ್ರಯತ್ನದಲ್ಲೇ  ತೊಳಲಾಟಕ್ಕೆ ಸಿಕ್ಕಿ, ಸಿರಿಭೂವಲಕಾವ್ಯದ ವಿಚಾರವಾಗಿ ಇಲ್ಲದ ಇತಿಹಾಸ ನಿರೂಪಿಸುವ ಸಾಹಸಕ್ಕೆ ಕೈಹಾಕಿ ವಿಫಲರಾದ ಪುಸ್ತಕಶಕ್ತಿ ಪ್ರಕಾಶನ ಹಾಗೂ ಅವರ ’ವಿದ್ವಾಂಸರಮಂಡಳಿ’ಯನ್ನು ಕಿಂಚಿತ್ತೂ ಕರುಣೆಯಿಲ್ಲದೇ ನಿರ್ದಯವಾಗಿ ತಮ್ಮ ಶಕ್ತ್ಯಾನುಸಾರವಾಗಿ ಆಧಾಸಹಿತವಾಗಿ ಖಂಡಿಸಿರುವ ಈ ಸರಳಪರಿಚಯಕಾರನ ವಿಚಾರಮಂಡನೆಯ ಶೈಲಿಯು ಎಂಥವರನ್ನೂ ಬೆಚ್ಚಿ ಬೀಳಿಸುವಂತೆ ರಭಸವಾಗಿ ಪ್ರವಹಿಸಿರುವುದನ್ನು ಓದುಗರು ಸಿರಿಭೂವಲಯಸಾರದಲ್ಲಿ ಕಾಣಬಹುದಾಗಿದೆ ಎಂದು ಇಲ್ಲಿ ತಿಳಿಸಬಯಸುತ್ತೇನೆ.
 ಸಿರಿಭೂವಲಯ ಕುರಿತು ಮುಂದಿನ ಸಂಶೋಧನೆಗೆ ತೊಡಗುವವರನ್ನು ದಾರಿತಪ್ಪಿಸುವ   ಅಪಾಯದಿಂದ ರಕ್ಷಿಸುವುದಷ್ಟೇ  ಇಲ್ಲಿ ತನ್ನ ಉದ್ದೇಶವೆಂದೂ ಯಾವುದೇ ವಿದ್ವಾಂಸರನ್ನೂ ಅವಹೇಳಮಾಡುವುದು ತನ್ನ ಉದ್ದೇಶವಲ್ಲವೆಂದೂ  ಸ್ಪಷ್ಟಪಡಿಸಿರುವ ಪರಿಚಯಕಾರನ ಅಂತರಂಗವು ವಿಚಾರಶಾಲಿ ಓದುಗರಿಗೆ ಅಲ್ಲಿ ಸ್ಪಷ್ಟವಾಗಿ ಗೋಚರವಾಗುತ್ತದೆ.
 ಸರ್ವಾರ್ಥಸಿದ್ಧಿಸಂಘದವರು ಪ್ರಕಟಿಸಿದ್ದ  ೧ ರಿಂದ ೩೩ ರ ವರೆಗಿನ  ಅಧ್ಯಾಯಗಳ ಅಶ್ವಗತಿ ಹಾಗೂ ಸ್ತಂಬಕಾವ್ಯರೂಪದ ಅಂತರ್ಸಾಹಿತ್ಯವನ್ನು ಮೊಟ್ಟಮೊದಲಿಗರಾಗಿ , ವ್ಯವಸ್ಥಿತವಾಗಿ  ಸಂಗ್ರಹಿಸಿ ಪ್ರಕಟಿಸಿರುವುದು ಈ ಪರಿಚಯಕೃತಿಯ ಬಹುಮುಖ್ಯವಾದ ಅಂಶವಾಗಿದೆ. ಇಲ್ಲಿಕಾಣಬರುವ ಹಲವಾರು ಹೊಸ ಹೊಸ ಮಾಹಿತಿಗಳು  ಸಾಮಾನ್ಯ ಓದುಗರಿಗೆ ಕುಮುದೇಂದುವಿನ ಸಿರಿಭೂವಲಯದ  ಸಮೀಪದರ್ಶನ ಮಾಡಿಸುವಲ್ಲಿ ಯಶಸ್ವಿಯಾಗಿದೆ.
ಅಂತರ್ಸಾಹಿತ್ಯದಲ್ಲಿ ಅಡಕವಾಗಿರುವ ಅಪರೂಪದ ಮಾಹಿತಿಗಳು ಸಿರಿಭೂವಲಯವನ್ನು ಕುರಿತಂತೆ ಪರಿಚಯಕಾರನ ಶ್ರಮದ ಸಾಧನೆಗೆ ಸಾಕ್ಷಿಯಾಗಿದ್ದರೆ, ಗ್ರಂಥಋಣದಲ್ಲಿ ಸೂಚಿತವಾಗಿರುವ ಕೃತಿಗಳ ವ್ಯಾಪ್ತಿಯು ಈ ವ್ಯಕ್ತಿಯ ವಿಸ್ತಾರವಾದ ಹಾಗೂ ಆಳವಾದ ಸಾಹಿತ್ಯಾಧ್ಯಯನದ ಸೂಚಿಯಂತಿದ್ದು, ಕೃತಿರಚನೆಗೆ ಪೂರಕವಾದ  ಅಪಾರ ಮಾಹಿತಿಗಳ ಖಚಿತತೆಯನ್ನು ನಿರ್ದೇಶಿಸುವಂತಿದೆ.
ಇಷ್ಟು ವ್ಯಾಪಕವಾದ ಪ್ರಾಚೀನಕಾವ್ಯದ ಪರಿಚಯಕೃತಿಯ ಪ್ರಕಟಣೆಯ ವಿಚಾರವು ಬಹಳ ಸಮಸ್ಯಾತ್ಮಕವಾದುದ್ದು.  ಹೆಚ್ಚಿನ ಆರ್ಥಿಕಸಂಪತ್ತನ್ನು ನಿರೀಕ್ಷಿಸುವಂಥದ್ದು. ಮೊದಲಿಗೇ ಮೂಲ ಕೃತಿಯು ’ಕಬ್ಬಿಣದಕಡಲೆ’ ಎಂಬ ಅಪಖ್ಯಾತಿ ಹೊಂದಿದ್ದು!! ಕಳೆದ ಶತಮಾನದ ಪೂರ್ತ ಈ ಕಾವ್ಯವು ವಿವಾದದ ನೆರಳಿನಲ್ಲೇ ಇದ್ದದ್ದು. ಮೂಲಕಾವ್ಯದ ಸುತ್ತ ಹುಟ್ಟಿಬೆಳೆದಿದ್ದ ಹಲವಾರು ಹುತ್ತಗಳ ವಿಚಾರ ಕೆದಕಿರುವ ಈ ಪ್ರಯತ್ನದ ಫಲವನ್ನು ಸಾಹಿತ್ಯಲೋಕಕ್ಕೆ ಒದಗಿಸಲು ವೃತ್ತಿನಿರತ ಪ್ರಕಾಶಕರು ಯಾರೂ ಮುಂದೆಬರುವ ಸಾಧ್ಯತೆ ಇರಲಿಲ್ಲ.
ಹೀಗಾಗಿ, ಸುಧಾರ್ಥಿಯೇ  ಕಾಗದ, ಮುದ್ರಣ ಮತ್ತಿತರ ವೆಚ್ಚವನ್ನು ಹೊರುವ ನಿರ್ಧಾರಮಾಡಿ ಈ ಕೆಲಸಕ್ಕೆ ಚಾಲನೆ ನೀಡಿದ ಕಾರಣದಿಂದಾಗಿ ನೆಪಮಾತ್ರಕ್ಕೆ ಈ ಪರಿಚಯಕೃತಿಯ  ಪ್ರಕಟಣೆಯ ಹೊಣೆಹೊತ್ತ ದತ್ತಿ ಸಂಸ್ಥೆ ಕಾಶಿ ಶೇಷಶಾಸ್ತ್ರೀ ಚಾರಿಟಬಲ್ ಟ್ರಸ್ಟಿನ  ಉಲ್ಲೇಖವು ಇಲ್ಲಿ ಕೇವಲ ಔಪಚಾರಿಕವಾದೀತಷ್ಟೇ.
ಈ ವಿಸ್ತಾರವಾದ ಪರಿಚಯಕೃತಿಯಲ್ಲಿ ಅಡಕವಾಗಿರುವ ಸ್ವಾರಸ್ಯಕರವಾದ, ಕುತೂಹಲಕರವಾದ ವಿವರಣೆಗಳಿಂದಾಗಿ ಓದುಗರಿಗೆ ಸಿರಿಭೂವಲಯ ಕಾವ್ಯದ ಸಮೀಪ ದರ್ಶನವಾಗುವುದು ನಿಜವಾದರೂ ; ಅಂತರ್ಸಾಹಿತ್ಯಭಾಗವು ಮೂಲಸಾಹಿತ್ಯರೂಪದಲ್ಲೇ  ಸರ್ವಭಾಷಾಮಯೀಭಾಷಾ ಕನ್ನಡದ ಸ್ವರೂಪದಲ್ಲೇ  ಇರುವ ಕಾರಣದಿಂದಾಗಿ ಅದನ್ನು ಸುಲಭವಾಗಿ ಓದಿ ತಿಳಿಯುವುದು ಸಾಮಾನ್ಯ ಓದುಗರಿರಲೀ ವಿದ್ವಾಂಸರಿಗೂ  ಕಠಿಣವಾಗಿಯೇ ಉಳಿದಿತ್ತು!     
ಈ ಸಮಸ್ಯೆಯ ಪರಿಹಾರಕ್ಕಾಗಿ  ಸುಧಾರ್ಥಿಯು ಎರಡನೇ ಹಂತದ ಸಂಕ್ಷಿಪ್ತ ಪರಿಚಯಕೃತಿಯೊಂದನ್ನು ರೂಪಿಸುವ ಕಾರ್ಯಕ್ಕೆ ಕೈಹಾಕಿರುವುದು ಕಾಣಬರುತ್ತದೆ. ಇದಕ್ಕೆ ಮೈಸೂರಿನ ವಿದ್ವಾಂಸರಾಗಿದ್ದ ಜಿ. ಬ್ರಹ್ಮಪ್ಪನವರು ನೀಡಿದ್ದ ಮೌಖಿಕ ಸಲಹೆ ಸೂಚನೆಯು ಮೂಲಕಾರಣವಾಗಿ  ಉತ್ತೇಜನನೀಡಿರುವುದನ್ನು ಸುಧಾರ್ಥಿಯು ಸ್ಮರಿಸಿರುವುದನ್ನು ಮುಂದಿನ ಸರಳ ಪರಿಚಯಕೃತಿಯಲ್ಲಿ ಕಾಣಬಹುದು.  (ಇನ್ನೂಇದೆ)
                                                                                                                                                                                             -ಜಮದಗ್ನಿಸುತ.